Urugendo rw’igihugu cose rw’Umunyamabanga mukuru wa CNDD-FDD ruri hafi kurangira inyuma y’amezi abiri y’ibikorwa ku rubuga.
Gitega, 4/04/2026 (BdiAgnews) – Mu gukomeza ingendo ziwe zo kwegera abanyagihugu no gukurikirana imigambi y’iterambere, Umunyamabanga mukuru w’umugambwe CNDD-FDD, Nyakubahwa cane Ndikuriyo Révérien, yagendeye kuri uwu wa gatanu igenekerezo rya 4 Ndamukiza 2026 amakomine ya Muhanga na Gitega, aho yashikanye ku makomine 41 kuri 42 amaze kugendako mu kiringo c’amezi abiri gusa, nk’uko yari yabisezeranye ko azoshika mu gihugu cose ; muri urwo rugendo, nk’uko vyagiye birakurikirana, yaragendeye amakomine ya Busoni na Musongati ku wa 11 Ntwarante, Kirundo ku wa 12 Ntwarante, Tangara ku wa 19 Ntwarante, Matongo ku wa 20 Ntwarante, Mugina ku wa 23 Ntwarante, Cibitoke ku wa 24 Ntwarante, Bukinanyana ku wa 30 Ntwarante, Bubanza ku wa 31 Ntwarante, Gisagara na Cankuzo ku wa 1 Ndamukiza, Kiremba na Ngozi ku wa 3 Ndamukiza, imbere yo gusozera ku wa 4 Ndamukiza ingendo ziwe mu ntara za Butanyerera na Gitega ; muri izo ngendo zose, yarahuye n’abarongoye intwaro n’abanywanyi b’umugambwe kuva ku rwego rw’imirenge gushika ku makomine, baganira ku ntumbero z’iterambere zashinzwe n’inama ziheruka z’umugambwe, zirimo guteza imbere uburimyi bw’amavoka n’ikawa, guteza imbere ubworozi bwa kijambere, gukwiragiza uburimyi bukoresha amazi, gushiraho amahinguriro, kurwanya inzara mu ngo no gukomeza imiryango ; yarashimye kandi intambwe zimaze guterwa n’abagumyabanga, cane cane imirima minini y’amavoka, ikawa n’ibindi vyimburwa yabonye i Muhanga na Gitega, vyashizweho mu kwishura umuhamagaro watangiwe i Ngozi n’inama nkuru y’umugambwe mu kwezi kwa Ndamukiza 2024, mu gihe yahamagariye abarongoye bose kwerekana indero nziza, ubuyobozi bubereye n’ugushira mu bikorwa imigambi kugira iterambere ry’igihugu ryihute.
Amasoko : Nahimana P. : burundi-agnews.org, Ku wa mungu 5 Ndamukiza 2026 | Ifoto : Intumwa Burundi