Abakenyezi b’Abarundi baba mu Bubiligi bateguye ibirori vy’akaroruhore, vy’umuco n’ubusabane mu guhimbaza itariki ya 8 Ntwarante.
Alost (Belgique), 28 Ntwarante 2026 (BdiAgnews) – Mu Burundi, igihugu kigendera ku Bungoma (ubumenyi n’imitekerereze yisunga Ingoma), igihe cose Buryenda, ni ukuvuga ikigo c’Umugore w’Ingoma Mukakaryenda, aho Karyenda, Ingoma Nyeranda, itaragarurwa mu kibanza cayo, umugore w’Umurundi aguma ari kure y’uburenganzira bwo gushika ku butegetsi bukuru. Ingoma y’Uburundi ni ubutegetsi bw’abantu babiri (dyarchie), burongowe na Mukakaryenda hamwe na Mwami.
Mu guhimbaza Umunsi mpuzamakungu wahariwe Umugore, Madamu Keza Consolée Marie Ange, Madamu Karimunda Rosa hamwe n’abakenyezi b’Abarundi baba mu Bubiligi bateguye, ku wa gatandatu 28 Ntwarante 2026 i Alost, ibirori vy’akaroruhore n’umuco vyashimishije benshi. Vyari vyateguwe ku bufasha n’ugushigikirwa n’Ambasaderi w’Uburundi mu Bubiligi, Nyenicubahiro Ntahiraja Thérence, afashijwe n’umugwi wiwe w’akazi mwiza w’Ubuserukizi bw’Uburundi, kandi vyabereye mu maso y’umupfasoni wiwe, Madamu Nitonze Éliane, bikoraniye hamwe Abarundi benshi baba mu mahanga mu kirere ciza c’urukundo n’ubusabane.
Ibirori vyabereye mu nzu ya paroisse Saint-Paul, vyaranzwe n’indirimbo n’imiziki vyaririmbwe na DJ Maestro na DJ Saido, hamwe n’ibiteramo vy’ingoma vy’umugwi Vumera Club ASBL wa Barandaje Jean-Barthélemy, umwe mu mirwi ikomeye cane y’abavuzi b’ingoma mu Burundi, bashize imbere ikimenyetso gikomeye c’umuco w’Abarundi. Hiyongeyeko ifunguro (buffet) hamwe n’akanya ko kuganira no gusabana vyafashije gukomeza ubumwe bw’abagize diaspora.
Ibirori vyari vyuguruye ku bantu bose, vyashize imbere uruhara rukomeye rw’umugore mu kibano, bikomeza kandi imigenderanire y’abantu, ubumwe n’ugufashanya hagati y’Abarundi baba mu Bubiligi. Abavyitabiriye bose babyemeye ko vyari ibirori vyiza cane, bishimangira inguvu n’ukwitanga kw’abakenyezi b’Abarundi mu kumenyekanisha umuco wabo no guteza imbere ishusho y’Uburundi ku rwego mpuzamakungu.
Inyandiko zifashishijwe :
– Nahimana Karolero Pascal, Burundi : La diaspora burundaise – Du monde, de Belgique et d’ailleurs – Histoire, trajectoires et ancrage, Bruxelles, Génération Afrique, 2025.
– Nahimana Karolero Pascal, Histoire du Burundi : Les grandes dates de l’histoire des Barundi et de l’État millénaire africain – Ingoma y’Uburundi, Éditions Génération Afrique, 2024.
– Nahimana Karolero Pascal, Réfugiés du Burundi — Quand Ingoma s’est tu. Histoire géopolitique d’un peuple brisé par la colonialité, Bruxelles, Génération Afrique, 2025.
🔗 https://nahimanakarolero.com
– Mbonyingingo Leona, L’Épouse du tambour, Montréal, 2025.
Amasoko : Nahimana P. : burundi-agnews.org, Ku wa mungu 29 Ntwarante 2026 | Ifoto : Vumera, BdiAgnews
